وقت او وقت اولدی حسین ترک ائلسون ائللرینی
وداع حضرت اباعبدالله الحسین علیه السلام
وقت او وقت اولدی حسین ترک ائلسون ائللرینی
باغبان ایستدی گورسون سارالان گللرینی
زینبین سسلدی اظهار ائده نسگلرینی
باجیسین خیمه قباقینده گوروب زاروملول
گوگلون آلسون قاباقا گلدی او دلبند بتول
یوزونی دوتدی حسین زینب زهرا شیمه
تاب ائدوبسن دئدی بوچولده هامی رنج وغمه
ای اولان یاوروغمخوار بو اهل حرمه
قدرت نطقه باجی فاطمه تک داراسن
منیم ایستگلی باجیم نائبهٔ زهراسن
دئیورم لحظهٔ هجراندا سنه سوزلریمی
قانه غلطان ائلیوب قوه دغا لشگریمی
وئرمیشم حقه فدا اکبریمی اصغریمی
بوبیاباندا گورورسن هامی انصاریم ئولوب
بیر کسیم قالمیوب عباس علمداریم ئولوب
یتمیش عاشق هدف عشقه چاتیبدور بیلوسن
منده کی حال غم افزانی باجی سن گوروسن
عازم جبههٔ جنگم منی الدن وئروسن
آیریلیق وقتیدی زینب دم فرقت یتیشوب
صف عشّاقیده الان منه نوبت یتیشوب
حرم ختم مآبی سنه من تاپشورورام
عترت قلب کبابی سنه من تاپشورورام
بینوا غملی ربابی سنه من تاپشورورام
بیلورم ئولدوره جک آل امیه بالامی
هامیدان چوخ باجی سن گوزله رقیه بالامی
مهِ عصمت باشوا یغ هامی اولدوزلاریمی
ساخلا سن زیر پرونده بالاجا قیزلاریمی
دای قیتمگ منه یوخ گوزله آدامسیزلاریمی
یوزومه گوزیاشیمی ایندی روان ائتملیم
سن حلال ایله حسینی باجی من گتملیم
سوزی پایانه یتوردی غرض ارباب حُمام
زینبی دیندیروب القصه دیله گتدی امام
آچدی باب سخنی زینب مرضیه مرام
باخدی باخدی دئدی ای فاطمیه نور دوعین
حرمین سن سن امیدی بیزی تک قویما حسین
هدف پاکوه اصلا دئمورم یتمه اخا
داریخان قلبیمی آماج بلا ائتمه اخا
دم غنیمتدی بیر آز صبر ائله تئز گتمه اخا
باشوه عترت طاهانی دولاندیر صورا گت
شمع حق سن من پروانه نی یاندیر صورا گت
تنگه دوشموش بومصیباتیده زینب نفسی
اوقَدَر آغلادی انصاره باتوب خسته سسی
داخی سندن صورا بو زینبیون یوخدی کسی
وار باشوندا بیلورم نقشهٔ پیکاروجدل
اذن وئر زینب ائده ائتدیگی پیمانه عمل
وقتیدی عهدیمون اوسته گرک ایندی دایانام
کهنه بیر پیر هنون منده وار ای شاه انام
ئوز الیلن توخیوبدور اونی مظلومه آنام
بیر وصیّت ائلیوب مادر غمدیده منه
هر نه زهرا بویوروبدور دئیورم منده سنه
منی آگاه ائلیوب فاطمه غم ساعتینه
بویوروب وقت وداع آغلا حسین محنتینه
کهنه پیراهنی گیدیر بالامون قامتینه
زینبیم درک ائله مجروح آنوین سوزوسازین
آیریلان وقته حرمدن ئوپ حسینون بوغازین
آیریلیق ساعتیدور صبر ائله ای فخر اُمم
قلبیمی درده سالوب موسم هجراندا بوغم
امر زهرادی وداع وقتی بوغازوندن ئوپم
سن دعا ایله حسین زینب غم پروروی
باشووی عرشه طرف دوت قوی ئوپوم حنجرووی
قالخیزوب سمت سمایه باشینی شاه حجاز
سینه وباش آراسی فاصله گورسندی بیر آز
ئوپدی قارداش بوغازین زینب او دم محرم راز
دئدی ایندی یولا دوش دفع ائده الله خطرون
سنی تاپشوردوم حسین حقه سلامت سفرون
ناگران اولما حسین جان علمون ساخلیارام
سینمی نار فراقونده اخا داغلیارام
گلرم مقتله قارداش یارووی باغلیارام
قلبیدن دور ائلدیم روز ازل واهمه نی
وصل جانانه چاتان وقته چاغیر فاطمه نی
اى قلم یاز بوسوزی دفتره توگ گوزیاشینی
مقتل قارداشا زینب چاتوب آچدی باشینی
باجی اما تانیا بیلمدی ئوز قارداشینی
دئدی ای گلشنینه باد مخالف اسیلن
دور باجون زینبی دیندیر باشی دالدان کسیلن
ای کریما نیه غارت اولونوب پیرهنون
تکّه تکّه داغیلوب مقتله عضو بدنون
گون اذیت ائلیورجسموه یوخدور کفنون
گور نه اندازه آتوب قوم دغا جسموه داش
سنی بو حاله سالانون ائوى ويران اولا كاش
حبذالله ره تقواده اولوب هر عملون
یتیشوب حیطه ی عشقونده مسلّم اجلون
باشووى شمر كسوب بس هانى جسمونده الون
اى هَزار علوى نغمه ى هجرانى اوخى
كيم ويروب قلبوون اوسته گوزلیم اوچ پر اوخی
صمدى) صاحب عصرون بوگوزل امرینه باخ
وی وداع روضه سینی شرح وئرن اجرينه باخ
اى يازان وى اوخيان زينبيمون صبرينه باخ
كلّ عشّاقه وارى زين ابون مرحمتی
ايكى دنيانى سالوب حیرته والا سِمَتی
#وداع_
https://telegram.me/naghmehaye_gham
*********************
حضرت ابوالفضل العبّاس علیه السلام
مرحوم حسینی سعدی زمان
اَلده سو جامی تیکوب گوز آل حیدر مشکیمه
رحم ایدون اوخ وورمیون ای قوم کافر مشکیمه
ناله ی اَلمائیله دولموش خیام طاهرات
شدّت سوز عطشدن عشّ ایدوب خوردا بنات
نه روادور چوللره دریا کیمی آخسون فرات
سو دِیوب یانسون باخاندا آل حیدر مشکیمه
ایلیوب سوز عطشدن آل علی قلبین کباب
بیر سودان چخمش بالیق تک اصغر ایلور اضطرابت
اَلده بوش پستانلاری لای لای دیور بی کس رباب
ایلوری امّیدوار اوغلون او مادر مشکیمه
بسکه اوچ گوندور سوسوزدور آغلاماقدان خسته دور
گورسه هر کیم حالینی سویلر یقین جان اوسته دور
چون حیاتِ اصغرِ عطشان بو مشکه بسته دور
یِر یوزین دولدورسا سو اولماز برابر مشکیمه
العطش صوتین ایشتمورسوز اَیا قوم نفاق
ناله ی آل پیمبردن دولوب دشت عراق
بیر بو مشکه گوز تیکوب هشتاده دین عورت اوشاق
راضیم قربان اولا بو باش بو اللر مشکیمه
جسمیمه یوز مین وورولسا نوک پیکان راضیم
دیده ی پر اشکیمی دولدورسا گر قان راضیم
مشکیمه اوخ دگمسون ای قوم عدوان راضیم
اوخ دگوب اولسون سپر بو دیده ی تر مشکیمه
خیمه ده خوردا اوشاقلار جام اَلنده تشنه کام
گوز تیکوب میدانه گوزلوللر بو سو مشکین تمام
کیم ایدوب آب حلالی فاطمیّاته حرام
منتظردور اشکیله مملوّ گوزلر مشکیمه
یار و انصاری حسینون جان ویروب یکسر سوسوز
دوغرانوبدور قاسم و ناکام علی اکبر سوسوز
اولمیون راضی جماعت جان ویره اصغر سوسوز
بسته دور بو غملی چولده عمر اصغر مشکیمه
گوشه ی غربتده سعدیِّ زمانم اشکبار
اهل بیتیندن اوزاق، پوزقون، پریشان، دلفکار
انتقام ظالمه منده گوگلده انتظار
گوز تیکوبدور ظلمدن دلتنگ نوکر مشکی https://telegram.me/naghmehaye_gham
78 KB
کوچ از قتلگاه کربلا
من علینون قیزیام درد وغم آغلاتدی منی
کسیلن قولاری صاحب علم آغلاتدی منی
بار الاها نجه گور غم منی ویران الیوب
یدی قارداشی اولان زینبی ویلان الیوب
دشمنین قوردوغو تور قزلاری نالان الیوب
اوت دوشنده بابامین همسری آغلاتدی منی
یادیمه دوشدی بقیعنون دری آغلاتدی منی
اول ابالفضلی کی هر ان دولاناردی باشیما
راضی اولمازدی بو احوالیمه یا گوزیاشیما
کوفیان ظلم الیوبلر اوجا بوی قارداشیما
اول علمدارین اوجا قامتی آغلاتدی منی
یوزو اوسته یخلوب محنتی آغلاتدی منی
نیلیوم چاره سیزم یوخدی بیر امداد ائلین
یاخامی شمرین الیندن گلیب ازاد ائلین
نیه یوخدور بو رقیه بالامی شاد ائلین
بو رقیه قیزیمون سوزلری آغلاتدی منی
ظلمیلن اوتدا یانان معجری آغلاتدی منی
اکبرو اصغر و قاسم هامیسی قانه باتوب
اولدروب اونلاری لشکر بوگون اهدافه چاتوب
نهر علقم ده ابالفضل دلاراده یاتوب
اکبرین پاره لنن پیکری آغلاتدی منی
التی ایلیق بالامین حنجری آغلاتدی منی
ای منه یاور و یولداش سسیمه سس ورحسین
یاتما گودالیده قارداش سسیمه سس ورحسین
توکورم چهریه قان یاش سسیمه سس ورحسین
قلبیوون یاره سی قارداش بودم آغلاتدی منی
اتدیگون قاتله لطف و کرم آغلاتدی منی
ای فراتین سویی لب تشنه لرین قاتلسن
چونکه یوخ سنده وفا قاتل و هم باطلسن
اخموسان چوللره از بس کی بیزه غافلسن
سنه یالواردی علی لبلری آغلاتدی منی
ورمدون اصغره سو حنجری آغلاتدی منی
زینبین اغلاماقی قلبیمی ویران ادجک
بو گجه بو قلمیم عشقیله طوفان ادجک
سوزی (فیروزی) یازبدور سنی نالان ادجک
بوحسینون شرف و منصبی آغلاتدی منی
اول خانم فاطمه نون زینبی آغلاتدی منی
#قتلگاه_
مشکی
استمداد قمر بنی هاشم حضرت ابوالفضل عباس
یول سال فرات اوسته کرم دریاسی قارداش
درک ایت یارالی قارداشون عباسی قارداش
قوللار گیدوب مشگ اوخلانوبدور سو یانیندا
عطشان دوشوبدور کربلا سقاسی قارداش
سن باغبانسان سرو و سروستانوام من
بیر عمردور پرورده احسانوام من
فریاده یت قارداش سنون قربانوام من
گر چه واریمدور چوخلی زخم جانگدازم
عشق عالمینده نوشودور بو سوز و سازیم
گلسن باشیم اوسته چوخ آرتار امتیازیم
اوللام بویوک شخصیتین داراسی قارداش
ای دولدوران شخصییتی ملک حجیری
سن مصطفی دلبندیسن زهرا عزیزی
من بیر غلامم هم آنام زهرا کنیزی
من تک کیمین وار رتبه والاسی قارداش
خوش دور گوروم ضل جلالی باشیم اوسته
گل سایه سال بیر ده بلالی باشیم اوسته
اون یدی قاتل وار یاراسی باشیم اوسته
اللرده تک تک خنجر برانی قارداش
میر ابیدم من باغ دین باغستانیندا
نیلوم دوشوب قالدیم یارالی سو یانیندا
قالدی سوسوز دین گلشن زیباسی قارداش
یکسر منیم اطرافیمی دشمن آلوبدی
قوللاریمی دست جفا تندن سالوبدی
شمشیریمله اللریم یرده قالوبدی
چوخدور بلالی باشیمین غوغاسی قارداش
ای خضره اعطا ایلین آب حیاتی
آلدیم سویی یاده سالوب تشنه بناتی
ایتدیم حرام اوز نفسیمه آب فراتی
بولدوم سوسوز دور ماسوا مولاسی قارداش
رسم وفادن سویلدیم حاشا کئچم من
اوز نفسیمی نفس حسینیمدن سئچم من
عطشان قالا زهرا عزیزی سو ایچم من
ساقط اولا منده وفا احساسی قارداش
ایستردی آرتور سون فرات اوز آبروسین
رمزا منیله باشلادی اوز گفتگوسین
سو ایچمدیم قویدوم گوزونده آرزوسین
چیخدیم سودان باشدا وفا سوداسی قارداش
چیگنیمده مشک احساسی چوخ اعزاز ایدردیم
سو شوقی باشدا شوقیله پرواز ائدردیم
گوش دلیمده قیزلار استقاسی قارداش
یول خیمه گاهه فکر ایدردیم بیرده ساللام
مشکیم دولی سقا آدیم دللرده قاللام
سیراب ایدوب نازلی سکینه گوگلون آللام
عرشه اوجالماز ناله ی الماسی قارداش
من مشکی حفظ ایتماقه ایتدیم سینه حایل
کیچدیم ایکی قولدان ایدم کسب فضایل
اللرده گیتدی اولمادیم مقصوده نایل
حسرتله باغریم اولدی قان دریاسی قارداش
یازدیم وفا لفظین یره اوز قانیمیله
سو مشکی می دوتدوم برابر جانیمیله
قولسوز ایدردیم حمل اوز دندانیمیله
تا امر مولانین اولا اجراسی قارداش
چوخ چوخ چالیشدیم قورتارام مشکی سلامت
افسوس اولا بیر اوخ ایدوب مشک صلابت
گل یوزلی قیزلاردان منی ایتدی خجالت
آخر سویی گیتدی دلیم یاراسی قارداش
اوخلاندی مشکیم قلبیمی یاندیردی آخدی
من مشکیمه مشکیم منه حسرتله باخدی
مشک آغلادی من آغلادیم گوز یاشی آخدی
دریایه دوندی کربلا صحراسی قارداش
خوشدور یارالی باش دیزونده جان ویرم من
قانلو یوزوم قارداش یوزونده جان ویرم من
آغلار گوزوم آغلار گوزونده جان ویرم من
صورت تاپا قارداشلیقین معناسی قارداش
یوزده یازار بو سوز یاشیم ایوای حسین وای
یالقیز کمکسیز یولداشیم ایوای حسین وای
ایوای بلالی قارداشیم ایوای حسین وای
نی تک سیزیلدار پیکریم اعضاسی قارداش
بیرجه نولوردی داغلی دلدن داغلاشیدوخ
آغلار بولود تک بیر دولیدوخ بیر داشیدوخ
با هم ایکی قارداش بو چولده آغلاشیدوخ
نوش ایتمه میش جام اجل صهباسی قارداش
گل سن اگر سن باشیم اوسته رافتیله
قوی دوشدوقوم یرده قالوم بو حالتیله
اوز مصر عیمده جان ویروم من خجلتیله
قالسون آدیم دینین خجل سقاسی قارداش
یوخدور آنام اولسون عزاسی نعشیم اوسته
دوتسون عزا باشی عزالی نعشیم اوسته
گلسون صباح زینب یارالی نعشیم اوسته
بیر اوخشاسون کرب و بلا زهراسی قارداش
شاعر:تائب تبریزی
التماس دعا.
خادم کوچک امام حسین:اسماعیل عبادی https://telegram.me/naghmehaye_gham
***************************
استمداد حضرت ابوالفضل العبّاس علیه السلام
مرحوم شانی
داده گل یا سیّدی یوخ اختیاریم من گلم
قولّاریم دوشدی بدندن قالدی بی صاحب علم
چوخ جسارتدور سنه من عرض ایدوم میدانه گل
گل یارالی نعشیمه باخ ناله و افغانه گل
تاجداریم حسرتیله دوندی باغریم قانه گل
اولمادی افسوس قسمت پای بوسه من گلم
دگمه سیدی مشکیمه اوخ گیتمه سیدی سو یره
محضریوه من گلردیم سورته سورته رو یره
یخدیلار آتدان منی بو فرقه ی جادو یره
ای کلیم اللهه وارث غرق دریای الم
من نه قدر ایتدیم بو مشکین حفظینه سعی و تلاش
گوزلریمدن اوخ دگیدی دگمییدی مشکه کاش
اولسا سو قول سهلیدور ویرّم آقا مین دفعه باش
بیله سودا ایتسه دشمن ایلرم بیع سلم
توکمرم بو صون نفسده بی سب گوزیاشیمی
بوندان اوتری سالّام آخِر زحمته قارداشیمی
بیر ایاقون آلتنا سورتم یارالی باشیمی
سن گوزیمدن لخته قان، من گرد ایاقوندان سیلم
بیرق اسلامه بولموشدون منی زیبنده سن
یاتماسون بلکه بو بیرق ایلدیم چوخ سعی من
نیلیوم گوردوم کسیلدی چارم ای شاه زمن
اقتداریم گیتدی الدن قولّاریم اولدی قلم
ساچموشام سنبل کیمی اوخ سینه ده بیر دسته من
ایتمیشم کوشش دفاعه اولموشام چوخ خسته من
سسلرم اَدرِک اَخاکَ یا اخی پیوسته من
وار امیدیم گل جمالون بیرده گورسم دینجلم
وار باشیمدا شور عشقیم ای شه مُلک حجاز
گل غلامون قیل اوزون دشمن یانندا سرفراز
ایلرم مولا یوزوم اوسته جنابون پیشواز
گر اسه باد خزان هنگام تشریفون بولم
من اگر بولسیدیم اولّام بیله سندن شرمسار
قیزلارا سو وعده سی ویرمزدیم ای شاه کبار
مشکیمی گورسه سکینه یاخشی درک ایلر نه وار
چوخ تقلّی ایتدیم امّا قویمادی قوم ظلم
آغلا شانی یالوار عبّاسه گینه بخت اولدی یار
مشکلون حلّ ایلسین مشکل گشایه یادگار
فکریوی ایلوب پریشان بو وفاسیز روزگار
یوخسا عاجزلر نه نطقون نه گیدر تاب قلم https://telegram.me/naghmehaye_gham
***************************
اظهار عطش حضرت رقیه به حضرت زینب در شب عاشورا
استاد حسین کریمی مراغه ای
اوره گيم يانور سوسوزدان کسيلوب توانیم عمه
منه بير ايچيم سو فکر ايت باشوا دولانيم عمه
دوزه بولمرم عطشدن بو گیجه صباح اولونجا
نولي بير گورم سرين سو ايچورم گينه دويونجا
نيه ئولمه دی رقيه سارالوب بئله سولونجا
قوتولور بهار عيشيم يتيشوب خزانيم عمه
گلوري سسي فراتين اوره گیم اسير هوسدن
پر آچوبدي مرغ روحيم اوچا آز قالور قفسدن
دوتولوب بوغاز باتوب سس داخي دوشميشم نفسدن
نجه صبر ايدوم بو ظلمه نجه من دايانيم عمه
بيزه نامه لر يازوبلا گتوروبله بو عراقه
اولا میزبان یهودی سويي باغلاماز قوناقه
نئجه سخت دشمن اولسا گینه رحم ائدر اوشاقه
سوزه يوخ دليمده طاقت قورويوب دهانيم عمه
آخوري سويي فراتين بو بلا لی سرزمينه
دوتوب اود يانور رقيّه دوداقين امیر سکينه
نيه باغليوب فراتين يولوني بو اهل کینه
يانور اصغريم عطشدن سویا يوخ گمانيم عمه
نيه گلميشوخ بیز عمه بو دیار پر بلايه
نيه جمع اولوب بو لشگر بو زمین کربلايه
گئديرم سوسوزليقيمدان باباما ائدن گلايه
ايلسون بو درده چاره شه انس و جانيم عمه
بو گیجه نه وار باشوندا دی گوروم وفالي عمه
نيه آغلوسان بابامون پوزولوبدي حالی عمه
نيه قارداشيم علينون سارالوب جمالی عمه
نيه آلموسان قوجاقه منی مهربانيم عمه
نيه عمه جان بو منزل بيزه نامبارک اولدي
بو يره قدم قوياندان آتامون جمالی سولدي
يتيشوبدي غم غم اوستن بيزه حاليميز پوزولدي
نيه دوشدي بو بلالی يره کاروانيم عمه
آنام اصغرين آچوبدور بلگين گلوب فغانه
چالور ال اياق سوسوزدان سارالوب او نازدانه
يري وار ئولونجه شیعه ایده گوز ياشين روانه
بو غمی يازوب"کريمي" اولا نوحه خوانيم عمه
احوالات و شهادت حضرت امام جعفر صادق علیه السلام
گریز به دفن شهدای کربلا علیهم السلام
***************************
نه دن چرخ زمانه دوشمیوبدور چرخ وگردیشدن
هزار افسوس منصور دوانیقی گورن ایشدن
وئروبدورزهرکین،دوشسون ولا تندیسی ارزیشدن
ولی دریای عزت زهر کین دن بی قرار اولماز
امامه جبراًامر اولدی نه بیر جای تامّل دی
ائدوب انگور سمّی دن تناول حالتی صولدی
امام و تاجدار مکتبه آخر اولان اولدی
مآل کار عاشق گرچه بیر آن ناگوار اولماز
کُلینی دندی ؛ تا صادق وئروبدور جانی جانانه
عزاسین دوتدولارعزّتله شهر اولدی عزاخانه
کفن بُرد یَمانی دن اولوب حاضر او سلطانه
پیمبرزاده نین بزم عزاسی ذرّه خوار اولماز
ولی جانلار فدا جدّی حسینه شاه عطشانه
قالوب گونلر قباقینده دگوب گون جسم عریانه
گلوبدور اوغلی طَـیّ الارضیله اول قانلی میدانه
امامین دفنینه غیر امامه انتظار اولماز
دولان قانیله میدانی دوتوب باشدان باشا اجساد
کفن آختاردی تاپسون تاپمادی شاهنشه اوتاد
آتا نعشین بوکوب کهنه حصیره دفن ائدوب سجّاد
هاچان بو وضع غمباری گورنلر اشکبار اولماز
تاپوب صونرا علیّ اکبرین نعشین او آزاده
آتادان آیری سالماقین روا بولموب دی دنیاده
اونی پایین پای شاهیده دفن ائتدی شهزاده
دئدی تاواردی دنیابیله شش گوشه مزار اولماز
یازوبدور قبرین اوستونده بوقبر شاه عُظمادور
سوسوزجاندان گئچندورسینه سی هرچند دریادور
یاتان توپراقلار آلتیندا عزیز قلب زهرادور
بو یرده اولماسا قان گوزیاشون،حقّی ادا اولماز
«مُصَیـّب» صادق آل عبادن عزّ و جاه ایسته
ئورک دردین دیوب سوزدل ایسته اشک وآه ایسته
او مولادن برات قتلگاه و خیمه گاه ایسته
حسینون زائری دنیا و عُقباده فِکار اولماز
https://telegram.me/naghmehaye_gham
*************************
شهادت حضرت امام جعفر صادق علیه السلام
جمال حبیبی زنجانی
سبک : دردیمون درمانی لایلای رقیه
ای یار ملک منظر صادق آدیوا قربان
آرام دل حیدر صادق آدیوا قربان
گوزلرون سوزلرون عالم فداسی
رئیس مذهبیم زهرا بالاسی
زهرانون عزیز اوغلی کان هنریم صادق
اسپهر ولایتده رخشان قمریان صادق
بند دل باقر سن نور بصریم صادق
محبوب حق داور صادق آدیوا قربان
ای جعفریلر شاهی سن قلزم تقواست
شان و شرف مکتب محبوب ودل آراسن
سن حجت رحمان سان عالملره مولاسن
دردانه پیغمبر صادق آدیوا قربان
ای کنز علوم اوغلی ای ناصر دین لبیک
سن طیب و طاهرسن الله معین لبیک
آزاده حسین اوغلی ای زهره جبین لبیک
بحر ادبه گوهر صادق آدیوا قربان
سن ایلدون احبابه تدریس عزاداری
شیعه بو پیاموندن ایلر آقا جان یاری
قیمتلی حدیثون وار داغدور هله بازاری
عشق اهلی ائدوب ازبرصادق آدیوا قربان
تاپشورموسان عشاقه ئوز دینون ادا ایتسون
اللرده ئولن شاهه عشق اهلی بکا ایتسون
سسلنسون حسینیم وای عاشوری به پا ایتسون
دلداده لره دلبر صادق آدیوا قربان
آتمیش بش ایل عمر ایتدون ای عشاق فرزانه
اولدون سن اوتوز دورد ایل حجت حق سبحانه
ظلمیله شهید اولدون یثربده غریبانه
اولدون ئورگی مضطر صادق آدیوا قربان
منصورین الی سینسون زهریلن ائدوب مسموم
سنده گوزلیم اولدون جدین کیمی چوخ مظلوم
یات سایه ی زهرا ده قدرین اولا تا معلوم
درد اهلینه اول یاور صادق آدیوا قربان
ای خاک بقیع سنده دفن اولدی در نابیم
سجاد و حسن باقر آیدی ، بودا مهتابیم
سینه نده یاتوب زهرا خورشید جهان تابیم
ای هم نفس مادر صادق آدیوا قربان
من شاعر نالانم اوخشور سوزوم احساسه
آدیمدی(حبیبی)من عبدم شرف الناسه
تاپشور منی صادق جان قولسوز عمون عباسه
یازسون آدیمی نوکر صادق آدیوا قربان
گوزلرون سوزلرون عالم فداسی
رئیس مذهبیم زهرا بالاسی
http://telegram.me/naghmehaye_gham